សម្តេចតេជោ ហ៊ុន សែន ប្រធានព្រឹទ្ធសភា ឆ្លុះបញ្ចាំងពីការអភិវឌ្ឍន៍របស់កម្ពុជា និងសមាហរណកម្មអាស៊ាន
ឥណ្ឌូនេស៊ី៖ នៅថ្ងៃទី ៦ ខែឧសភានេះ ក្នុងបាឋកថា ក្រោមចំណងជើងថា «កម្ពុជា និងអាស៊ាន អាស៊ាន និងពិភពលោក» សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានចែករំលែកការយល់ដឹងអំពីដំណើររបស់ប្រទេសជាតិ ដោយសង្កត់ធ្ងន់លើសារៈសំខាន់នៃការតស៊ូអតីតកាលរបស់កម្ពុជា និងការវិវត្តន៍ខ្លួនក្នុងចូលក្របខណ្ឌអាស៊ាន។
ថ្លែងទៅកាន់មន្ត្រីរដ្ឋាភិបាល និងអ្នកសង្កេតការណ៍អន្តរជាតិ ប្រធានព្រឹទ្ធសភាសម្តេចតេជោ ហ៊ុន សែន បានឆ្លុះបញ្ចាំងពីបញ្ហាប្រឈមដែលកម្ពុជាបានជួបប្រទះ ដោយពណ៌នាថាជាបទពិសោធន៍ដ៏មានតម្លៃដែលរួមចំណែកដល់ប្រវត្តិសាស្ត្រ និងទស្សនវិជ្ជារបស់ប្រទេសជាតិ។ សម្តេចតេជោ ហ៊ុន សែន បានបញ្ជាក់ថា៖ «មួយជីវិតរបស់ខ្ញុំ ការលំបាកទាំងឡាយដែលខ្ញុំបានជួបប្រទះ ហើយត្រូវខិតខំជំនះ គឺជាបទពិសោធដ៏មានតម្លៃ មិនមែនសម្រាប់តែខ្លួនខ្ញុំនោះទេ ប៉ុន្តែក៏មានអត្ថន័យជាប្រវត្តិសាស្ត្រ និង មានលក្ខណៈជាទស្សនវិជ្ជាដឹកនាំរបស់កម្ពុជា ដែលយើងតែងតែទទួលអារម្មណ៍ថា ជាប្រទេសអាភ័ព្វ ជួបទុក្ខវេទនា និង សោកនាដកម្មរាប់មិនអស់»។
យ៉ាងណាក៏ដោយ ប្រធានព្រឹទ្ធសភាកម្ពុជា បានសម្តែងនូវមោទនភាពចំពោះការរីកចម្រើននាពេលថ្មីៗនេះរបស់កម្ពុជាក្រោមការដឹកនាំរបស់សម្តេច និងគណបក្សប្រជាជនកម្ពុជា។ សម្តេចតេជោ បានគូសបញ្ជាក់ថា ប្រទេសនេះលែងត្រូវបានគេចាត់ទុកថាជាប្រទេសក្រីក្រទៀតហើយ ហើយបានទទួលការគោរពពីសហគមន៍អន្តរជាតិក្នុងនាមជាអ្នកចូលរួមយ៉ាងសកម្មក្នុងការកសាងសន្តិភាព និងកិច្ចសហប្រតិបត្តិការក្នុងតំបន់។ សម្តេចតេជោបានថ្លែងថា៖ «ក្រសែភ្នែកអន្តរជាតិ ក៏បានចាប់ផ្តើមមើលមកកម្ពុជា ក្នុងមនោសញ្ចេតនាគោរព និង ផ្តល់តម្លៃ»។
សម្តេចតេជោ ហ៊ុន សែន បានមានប្រសាសន៍ផ្តោតលើការសម្រេចចិត្តជាយុទ្ធសាស្ត្ររបស់កម្ពុជាក្នុងការចូលរួមអាស៊ានជិតបីទសវត្សរ៍មុន។ ប្រធានព្រឹទ្ធសភា សម្តេចតេជោ ហ៊ុន សែន បានគូសបញ្ជាក់ពីសារៈសំខាន់នៃចំណាត់ការនេះ ដោយពណ៌នាថាវាជាព្រឹត្តិការណ៍ប្រវត្តិសាស្ត្រ និងការទូត ដែលជះឥទ្ធិពលជាវិជ្ជមានដល់ការអភិវឌ្ឍន៍នយោបាយ សេដ្ឋកិច្ច និងវប្បធម៌របស់កម្ពុជា។
សម្តេចតេជោ ហ៊ុន សែន បានលើកឡើងពីហេតុផលស្នូលចំនួន ៤ ដែលធ្វើឲ្យសមាជិកភាពរបស់កម្ពុជាក្នុងអាស៊ាននៅតែមានសារៈសំខាន់ ទី១ គោលការណ៍មិនជ្រៀតជ្រែកចូលកិច្ចការផ្ទៃក្នុងរបស់ប្រទេសជាសមាជិក ទី២ ស្មារតីសហគមន៍ ទី៣ ការអភិវឌ្ឍសេដ្ឋកិច្ច និង សង្គម តាមរយៈការជំរុញសមាហរណកម្ម និងទី៤៖ ច្រកទ្វារនៃកាលានុវត្តភាពការទូតរបស់កម្ពុជា។
ប្រធានព្រឹទ្ធសភា សម្តេចតេជោ ហ៊ុន សែន បានបញ្ចប់ដោយបញ្ជាក់ជាថ្មីថា គោលការណ៍ទាំងនេះបន្តគាំទ្រការចូលរួមរបស់កម្ពុជាជាមួយអាស៊ាន និងមានសារៈសំខាន់ចំពោះការអភិវឌ្ឍជាបន្តរបស់ប្រទេស៕
រូបថត៖ អាស៊ាន
